ونسة مع زول ما عادى .. الشيخ بلة الغائب: 
عندى حكومة من الجن المسلم الكافر
اتونس معاه خليفة حسن بلة
* منذ زمن ابحث عن الشيخ بلة الغائب لما يحيط به من اسرار .. تجددت الرغبة بعد ما قريت بياناته الاخيرة يدعو فيها للتوحد والتكاتف فى خطوة جريئة وجديرة بالاحترام والاعجاب … وبسهولة جدا توفر لى اللقاء به هذه المرة وان كان هناك عجلة الا اننا ننوى العودة مرة أخرى .. 
أبو جلابيه وسديري
أبو جلابيه وسديري
* * فى البداية منو هو الشيخ بلة الغائب؟
* = بلة الغائب مواطن سودانى عادى جدا
* * الغائب دة اسم ام لقب ؟
* = لا الغائب هو اسم واسم جدى ابو العائلة كلها وهو رجل دين ونحنا اسرة دين اما انا اقول ليك انى زول عادى
* * بالعكس تماما انت ما زول عادى وممكن اختصارا لكلام كتير وجدل طويل اوصفك بى انك زول خارق
* = اولا جزاك الله خير رغم انى ما داير اتكلم فى المواضيع دى الان لكن مافى مشكلة اقول ليك المولى عز وجل قال وفضّلنا بعضكم على بعض .. وانا احمد الله اسرتى رعتنى من صغرى وخلتنى احفظ القرآن وبالتجويد كمان والاحاديث النبوية وانا ما زلت تلميذ صغير
* * بيحكوا عنك قصص خيالية .. قادر تحدد لينا بداية القصص دى او الكرامات زى ما بقولوا عنها بعض الناس ؟
* = ايوة يا اخى ودى كانت بداية مشاكلى مع الناس .. بعد حوادث الجزيرة ابا فى مواجهتهم مع مايو اعتقلونى مع آخرين وودونى الحراسة
* * التهمة شنو؟
* = قالوا انا من الناس الدخلوا السلاح للجزيرة ابا للمجاهدين هناك
* * وهل فعلا انت قمت بى دة ؟
* = لا والناس العملوا كدة اعترلافوا وقالوا ليهم بلة ما معانا
* * وانت اصلا من الجزيرة ابا ؟
* = لا انا من جنوب كردفان ووالدتى عركية من ابو حراز مدنى وهى بت الشيخ محمد ود يونس
* *وكيف وصل ابوك من كردفان لمدنى ؟
* = ابوى كان طالب علم وجلس فى ابوحراز عند اهلك العركيين وحفظ والشيخ اعجب بيهو شديد وقال ليهو انا ما عندى حاجة اكافئك بيها الاانى اعرس ليك بتى وقال ليهو قبلت دى القصة
* * نرجع للسلاح والجزيرة ابا ؟
* = ايوة .. المهم قبضونى وكلبشونى ودخلونى الحراسة انا هنا اتهيجت لأنى انا من ما قمت ما عملت غلط ودة كان امتحان وقربت افشل فيه لأنو ربنا بقول من كان مع الله فان الله معه .. معناه انا ما مفروض اتضايق او اثور مفروض اصبر .. غايتو بى اختصار كدة وقت نادى المؤذن لصلاة الظهر اتفكت منى الكلابش وطلعت من الحراسو وجو لقونى مافى
* * كيف اتفكت .. عملت شنو انت عشان تتفك منك ؟
* = الا بذكر الله تطمئن القلوب… انا يا اخى الكريم من ما قمت بذكر ربى وعندى اوراد كتيرة .. ودة ما صلاح دة ذكر
* * انا بسأل بالضبط اللحظة قبل ما تنفك منك الكلابيش وتنفتح الزنزانة ؟
* = هى ما انفتحت .. لكن انا بس فى سرى قلت يا ربنا انت قلت وقولك الحق من اتقانى جعلت له مخرج يا رب انا من ما قمت لا هتكت عرض زول لا سرقت لا زنيت ولا اكلت حق زول وانا من ما قمت فى تقواك اين مخرجك الان يا ربى
* * أها ؟
* = والله ما اشعر الا بى نفسى أقل من حجم النملة وقعت منى الكلابيش براها ومرقت والناس قاعدين قدام الحراسة .. وقت بقيت برة الحراسة حسيت بى دوشة شوية كدة لكن بعدها بقيت عادى
* * وهربت ؟
* = اشرد يعنى ؟ لا طبعا مشيت المسجد صليت الظهر وبقيت قاعد منتظر العصر و اتاريها الدنيا انقلبت برة
* * ومشيت وين؟
* = ضابط شافنى فى المسجد رجع كلمهم جو لقونى فى الركعة الاخيرة من صلاة العصر وقبضونى قلت ليهم يا جماعة انا مرقت اصلى وراجع ساقونى تانى
* * وقفلوك تانى ؟
* = جابونى للعقيد اسمو ميرغنى سليمان خليل ود ناس عبدالله خليل قلت ليهم يا جماعة لا اله الا الله كلهم قالوا محمدا رسول الله .. قلت ليهم يا اخوانا جانى الامر انى تانى ما اقعد فى الحراسة والله تقفلونى بى هنا اطلع بى هنا وما فى خوف منى
* * ووافقوا طبعا ؟
* = لا بالعكس ضحكوا على كلامى وقام العقيد قال ليهم اقفلوه جوة وختو عليه الكلابيش وادونى المفتاح وفعلا تم دة كلو بعد ربع ساعة بس فتحو الحراسة لقوا القيد والكلابيش قاعدة والطبلة مقفولة وانا مافى
* * كنت وين ؟
* = جو لقونى قاعد فى المسجد … غايتو لأنو القصة طويلة اختصرها ليك .. انتشر الخبر والناس بقوا يتوسموا فينى الخير اى زول عندو مشكلة بجينى اديهو الفاتحة يجينى بعد فترة يقول انو امرو انقضى والحمدلله بقى اى زول داير علاج او عندو مشكلة يجينى ومن هنا اتخلقت مشكلتى العملتوا والما عملتوا بقولوا سويتو انا
* * لكن انا سمعت انو انت عندك علاقة كبيرة مع الجن ؟
* = نعم ومن ما قمت انا يا اخى خليفة عندى علاقة متينة مع ملوك الجن ودى انا بعتبرها نعمة واما بنعمة ربك فحدّث..
* * من متين بالضبط كدة ؟
* = من عمرى 12 سنة ولغاية الآن لحظتى الهسة دى
* * علاقتك مع الجن المسلم طبعا
* = حتى الجن البضل الناس اللى هو السفلى عندى معاه صلة
* * لكن يا شيخ بلة ممكن لمسلم يتعامل مع سفلى ؟
* = انا شخصيا مسيطر عليه بمعنى انو ما يقدر يضلنى لكن انا اوظفه فى الخير عنى هو تحت امرى
* * انت زاتو كيف قدرت تسيطر على عالم زى دة ؟
* = انا من صغير لانو ابوى كان بملك عدد من الجن وحتى الروحانيين العلويين وابوى كانت عندو علاقة كبيرة مع الشيخ المكاشفى والشيخ عبدالله العركى الكبير .. وورثت الجن دة من ابوى وانا بعتبرهم اصدقاء وبوظفهم
* * يعنى ممكن نقول عليهم حكومة ؟
* = ايوة بالضبط كدة ممكن تقول انهم حكومتى وفيها المسلم والوثنى وغيره
* * ……………………؟
* = عمر البشير مسلم و بتلقى فى حكومته المسلم والمسيحى وبتلقى معاه ناس من حزبو ومن غير حزبو ؟ دة برضو بحصل معاى فى حكومتى
* * علاقتك بيهم كيف؟
* = علاقة خوة وصداقة لو واحد غاب منى بتفقدو ولو واحد اصابو مرض بزوروا فى محلو … وهسة البحرسوا بهايمى فى مزرعتى اخوانى فى الله ديل
* * يعنى معناها بتلاقيهم عيانا بيانا ؟
* = بسم الله الرحمن الرحيم يا اخى زى ما قاعد معاك هسة ولو جيتنى فى مزرعتى فى الباقير بتلقاهم معاى عادى جدا .. انت زورنا بس دون مسجلك وكاميرتك دى
* * وشكله مخيف زى ما بصوروه لينا ؟
* = لا يا اخى عادى جدا .. المخيف داك من المردة و بعيش فى الاماكن القذرة
* * شنو حكاية مثلث برمودة ؟
* = انا قبل كدة جاوبت على السؤال دة وقلت لى واحد دى لا جاذبية ولا حاجة انما دة تحدى من ملوك الجن للولايات المتحدة الامريكية واقيف فى النقطة دى هنا ولو جيتنى زيارة نتكلم فى الموضوع بس ما فى لقاء صحفى لأنو دى اسرار انا ما بحب احكى عنها
* * ليه ؟
* = لأنى لوحكيت عنها فى ناس حتخاف منى وانا بعتبر ربنا جابنى رحمة لناس المليون ميل مربع .. وخلينا نقيف فى النقطة دى
* * جدا وننتقل معاك لنقطة تانية
* .. انت سياسى ؟
* = لا انا مواطن عادى زى ما قلت ليك وما بنتمى لأى حزب لا امة لا اتحادى لا شيوعى لا حركة شعبية
* * ولا مؤتمر وطنى؟
* = حتى هذه اللحظة انا لا انتمى لأى حزب سياسى لكنى مواطن متابع
* * لكن ما فى مواطن عادى بكتب بيانات وينشرها على نفقته الخاصة فى صفحات كاملة
* = لأنى لقيت الكيل طفح .. الكيل طفح يا اخى خليفة
* * من متين ؟
* = خلينى اسرد معاك تاريخنا سريع
* * اتفضل
* = عبود جاء وأدى الناس امل لكن ما خلوهو وجاء نميرى والناس
* * ليه فطيت ثورة اكتوبر ؟
* = ايوة جات اكتوبر وبى احزابها وبعدين عملوها لينا كلها دة ود عمى ود ود خالتى ود اخوى وقسموها وطلعنا بدون حمص وفشلت .. اها جاء نميرى وعمل .. لكن برضو قامت فئة دخلت لأبناء المليون ميل مربع انو نميرى دة انسان خاين وما حينهض بيكم وسمعوا الكلام وغيروا الوضع وفى الآخر جو ندموا
* * على الانتفاضة ؟
* = ايوة ندموا عليها .. وربنا لطف وقام سوار الدهب وحفظ الامن للبلد كتر خيرو .. لكن للأسف جات تانى الاحزاب وطلعنا برضو بدون حمص
* * كأنك عندك راى فى السيدين ؟
* = شوف يا اخى الصادق المهدى نعم جدو المهدى حارب وناضل وحرر السودان ومابننكر وابن السيد على برضو ابوه شارك ويقال انو جدو الرسول صلى الله عليه وسلم وانا ما متأكد لكن سمعت كدة وببحث هسة فى الامر دة ومن هنا اقول ليك انا بحترم الاتنين رغما عن انفى .. اها جاء البشير
* * الزمن الجاء فيهو البشير وقت مناسب ؟
* = يا اخى عمر البشير وقت جاء واستلم زمام الأمور لقى خزنتك فاضية والسودان كان ماشى فى هاوية .. ياخى نسوانا واخواتنا بصحو الساعة اتنين صباحا يمشو يختو الطوب فى صف الرغيف ولو واحدة لقت طوبتها زحوها الشمطة تقوم .. ونحنا كنا بنبيت فى صف البنزين وبنشرب الشاى والقهوة بالبلح .. عليكم الله خلونا نقول الحق سيبونا من جبهة اسلامية او اخوان مسلمين او اى مسميات بوصفوا بيها عمر البشير ونقيف معاه فى حاجة واحدة بس انو هو زول بقول لا اله الا الله محمدا رسول الله دى مفروض تخلينا نتناسى خلافاتنا كلها ونقيف معاه ولأنو حقق انجازات
* * ……………………..؟
* = نفس الحصل زمان انا شايف فى ناس قاموا تانى يوزوا فى اولاد الحلال ويقولو ليهم السودان بالطريقة دى ما بمشى لى قدام
* *بتتهم منو ؟
* = ناس الاحزاب والطابور الخامس وديل حيخلونا نخم ونصر وحنشرب بى سببهم الموية بى دودها وما نروى
* * يعنى يا شيخ بلة انت مع عمر البشير قلبا وقالبا ؟
* = ايوة دة يا اخى خليفة زول وطنى اولا هو لا عندو فاطمة لامحمد يخاف عليهم كان اسهل ليهو يسوق مرتو ويمشى اى مكان يعيش فيه منعم وسالم ومرتاح لكنو لا زول وطنى وحارق دمو معانا .. حقو اى واحد مننا يفتح عيونو ويراقب اولاد الحرام الدايرين يضيعوا السودان
* * طيب انت شايف شنو فى مستقبل البلد دى ؟
* = السودان دة ما فى اى دولة حتحصلوا فى الثروة والرخاء ولا حتى دول الخليج زاتها
* * وبالنسبة لى امريكا ومجلس الأمن؟
* = لالالا امريكا ما جاياكم ما تخافوا
* * الايام دى اظنك سامع بالقوات الاممية ؟
* = يا ابنى مافى اى قوات دولية خاشة عليكم .. ودة خليهو سر بينى وبينك
* * لو سمحت لى ننشرو على الاقل دة امكن يطمئن الناس
* = قول ليهم ما فى اى قوات خاشة لا فى غرب السودان لا العاصمة دى بالونة اتقدت ليها خمسة ستة يوم
* * ممكن توظف اصدقاءك من الجن فى انهم يقيفوا معاك فى حرب ضد قوات معتدية ؟
* = لا حولة ولا قوة الا بالله .. بتعرف حاجة اسمها النحل ؟
* * ايوة
* = اها النحلة دى عندها عضة بتقتل خاصة الزول العندو حساسية وانا فى مقال اتنشر الاسبوع الفات كتبت فيه نصيحة لى بوش قلت ليهو اذا اراد الله واتصادمنا ? لا قدر الله- امريكا هى الخسرانة
* * كيف ؟
* = بالنحل بس
* * كيف؟
* = اتخيل نفسك سايق طيارة او شايل مدفع وهاجمك نحل وبعضعض فيك .. بتقدر تواجهه؟ دة شغل الجن بتاعنا ما فى قوة اقوى منو الا الملائكة
* * طيب بنفس الفهم دة ممكن واحد يقول لينا امريكا زاتها عندها جن ؟
* = مالو ممكن هم برضو اهل كتاب خليهم يطلعوا جنهم وانحنا الأقوى والجن المسلم اقوى من جنهم
* * دة بالنسبة للحرب .. غير كدة ممكن توظف الجن فى شنو ؟
* = يا اخى انا وظفت الجن عشان يسلم مسيحيين ويهود
* * مثلا ؟
* = انت ما سمعت قصتى مع الصحفى اللبنانى سليم اللوزى ؟
* * لا
* = احكيها ليك .. سليم اللوزى جانا ايام مايو عشان يعمل حوارات وشغل من هنا لصحفه فى بيروت اتعرفت بيهو وفى جلسة كان حاضرها صديقه احمد سليمان المحامى وكان وزير العدل الوقت داك قام سليم اللوزى قال لى الاسلام ما على حق والمسيحية ما على حق والكون دة فى حاجة مسيراه ..بعدين ما مصدق حكايتى مع الجن والعالم دة .. قلت ليهو اسمع يازول انت بيتك وين ؟قال لى فى بيروت قلت ليهو اعز حاجة فى بيتك شنو ؟ قال انو هو اتزوج قبل ستة شهور واعز حاجة عندو صورة الزواج بتاعته لأنو بحب زوجته شديد .. قلت ليهو وصف لى بيتك وفعلا وصف لى وبمجرد ما انتهى من الوصف كانت الصورة وصلت وتكلوها فى كرسى جنبنا وبعد ما انتهى قلت ليهو الصورة زى دى ؟ وقف شاف الصورة طوالى قال لأحمد سليمان انا داير اتوضأ وفعلا اتوضأ واسلم ورجع لبنان وهناك كتلوه
* * ……………………..؟
* = القصة التانية كانت مع ديفيد اليهودى
* * ودة الجابو ليك شنو ؟
* = دة جا من امريكا عشان يفرش قاعة الصداقة موكيت كدعاية لشركاته فى امريكا .. اللواء محمود عبدالرحمن الفكى عليه رحمة الله كان هومدير القاعة وديفيد بلقاهو كل يوم بصلى فى المكتب النافلة قام سأله محمود جاوبو قام قال دة كلام ساكت ما فى دين لا اسلام لا مسيحية .. محود قال ليهو انا بجيب ليك واحد يناقشك
* * وجابك انت ؟
* = ايوة جانى محمود زعلان قال لى فى يهودى قال كلام صعب دايرك بكرة تجى تناقشو وفعلا جيتهم فى مكتب محمود وكان معاه ناس كتار منهم ابوالقاسم محمد ابراهيم وخالد حسن عباس وزين العابدين محمد احمد عبدالقادر ومحمود .. جيت خاشى سلمت عليهم وابيت اسلم عليه
* * ليه؟
* = سألنى هو زاتو وقلت لأنك ما طاهر وما صليت الصبح .. قال لى انا ما مسلم الجماعة قالوا لى سلم عليه وبدينا نتناقش وسألتو عن اعز حاجة فى بيتهم ممكن اجيبها ليهو بسر القرأن قال انو الرئيس الامريكى كارتر اهدانى هدية عبارة عن شجرة فيها كل اسماء فروع الشركة فى امريكا لفوزنا باحسن شركة وبرضو وصف لى الفيلا بتاعته فى كاليفورنيا وبمجرد ما انتهى الوصف كانت الهدية قدامنا
* * وآمن ؟
* = اول حاجة استاذن من محمود عشان يتصل من تلفون المكتب على زوجته فى كاليفورنا لانو ما كانت فى موبايلات وفعلا زوجته ما لقت الهدية فى مكانها قام قال ليها ما تنزعجى ابونا جابها لينا هنا وهى معاى هسة والزول داك فى لحظته اسلم ولحقتو مرتو
* * وعلاقتك بيهو ما زالت مستمرة ؟
* = طبعا يا اخى والموبايل الشايلو دة منه وكل خمسة ستة شهور برسل لى موديل جديد وامكن هسة عندى اكتر من تلاتين موبايل وصدقنى لو قلت ليك يوميا بتصل على وبنتواصل وحتى انو اتعلم عربى وسمى نفسو على ومشى مكة وزن نفسه واتصدق بى وزنو دهب وعمل نفس العملية دى فى المدينة المنورة
* * وآخر ما تحب تقولو لمن يقرأ هذه الونسة ؟
* = نتوحد ونتفق على العدو الخارجى وكرسى الحكم دة ما شرط الا نقعد فيهو كلنا .. معقول يا جماعة اى زول الليلة يشيل سلاح ضد اهل بلده .. ونشتم بلدنا ؟ دة ما صاح ولا يجوز وحقو الناس يكبرو على الحاجات الصغيرة .