الشاعر التجاني حاج موسي : انا ود امو وبعت أكياس وعمري 6 سنوات
اتونس معاه : خليفة حسن بلة
عندما دخلت الى مكتبه بمجلس المصنفات الادبية والفنية بام درمان في الثانية عشرة من ظهر الثلاثاء وجدته يتناول افطارا من السمك الشهي ومعه الاستاذ الفنان شرحبيل احمد ندمت على انني سبقتهما بسندوتش فول لكنني تشرفت بهذا اللقاء والبارد والقهوة .. التجاني تعطر بعد الفطور وجلس يراقبنا شرحبيل .. قلت للتيجاني انا جــاي وعارفك وزير خارجية .
* سألني : كيف يعني ؟
- قلت : اقصد انك دبلوماسي جدا في اجاباتك عشان كده بطلب منك تتنازل عنها في هذا الحوار وتسمح لي بالالحاح لتتنازل .
في قصيدة اتمنيت لو كتبتها واغنية حقتي اتمنيت لو ما كتبتها
* قال : اقول ليك شئ .. انا جاهز يلا . .. وبدأنا قلت له اختار المدخل براك .. وقد فعل هكذا ..
التجاني : حينما وضعت الحرب العالمية الثانية اوزارها في مدينة صغيرة نائية بالنيل الابيض تدعي دويم شاد ولد العبد الضعيف لله التجاني ود دار السلام بت عبد الله ود اب زيد ابن الشريف موسى حاج موسي حامد عثمان وكان الابن الوحيد لوالديه .
* بتتذكر اليوم بالضبط ؟
- انا اتولدت يوم الاثنين 22/12/1949م .
* ما بتدس عمرك ؟
- لا .. انا ما بدس عمري لسبب واحد لانها مغالطة لانه مهما بلغ الانسان من عمر طويلا او قصيرا فهو لا محالة راحل من هذه الدنيا .
* وعمرك الفني ؟
- استطيع ان اؤرخ له منذ العام 1970م ميلاد اول عمل لي اغنية قصر الشوق لحنها عمر الشاعر وغناها زيدان ابراهيم.
* يعني حوالي 30 سنة شعر .. طيب وعمرك بالقصائد كم ؟
- يعني اكثر من 300 نص ..
* شنو حكاية الدويم دي يجي منها سر الختم الخليفة ويحكم السودان ويجي منها المتعافي يحكم الخرطوم وتجي منها انت تحكم ذوق الناس بشعرك وبوظيفتك في المصنفات ده سر تفتكر ام صدفة ساكت كده ؟
- لا ما صدفه .. السر في المدينة دي انها مدينة علم ونور فبخت الرضا ليها دور في الامر ده وثانيا هي مدينة صغيرة جدا جداً العلاقات بين اهلها علاقات اولية ونستطيع ان نقول انها قبل ما تتسع كانت مدينة قرية راقية وانا دائما بشير ليها وبشبهها بي اكسفورد .. يعني مدينة قامت عشان تخدم معهد بخت الرضا وده كان المعهد الوحيد في المنطقة الافريقية والعربية في وضع مناهج التربية والتعليم .
* عشت فيها لغاية ما طلعت للجامعة .. هل كان ده اول عهدك بالخرطوم ؟
- لا كنت بجي مع حبوبتي لامي وهي تاجرة عندها محل في سوق الدويم .
* اسمها منو ؟
- اسمها فاطمة بت الفكي محمد (ربنا يرحمها ويغفر ليها) شيخ سوق ام درمان اسماعيل محمد الله يرحمه ويغفره ليه يبقي اخوها كان عندو زوجتين فبنمشي العباسية ونمشي حي البوستة .
* ………………؟
- بجي معاها وبكون سعيد جدا جدا رغم جيتنا سريعة كلها 5 ايام وبنقعد مع اولاد خيلانا بنبسط بكوني اقليمي لقى ليه كم سينما دورين وحديقة الحيوان ومحل الداندرمة والمكتبة العامة .
* ودي في الدويم مافي ؟
- تقريبا في لكن الوسط هنا انك جاي مدينة متسعة تتلفت في الشوارع وعلى فكرة ركبنا الترماي في آخر ايامه والبصات البلوبيرد وكان الجنيه بتشتري بيه كمية من الدولارات وكان اجمل سوق في افريقيا والعالم العربي للاحذية والقماش والحاجات هو السوق الافرنجي بالخرطوم.
* واضح من علاقتك بي امك المعروفة للناس وموثقة بقصايدك وعلاقتك مع حبوبتك انك عندك علاقة متميزة مع المرأة وليها مكانة جواك ؟
- اى زول اذا انا لقيتو في الشارع بشاكل في امرأة وايا كانت هذه المرأة ومهما كان سبب المشكلة فأنا ضدو طوالي .. انا مع المرأة مخطئة ام مصيبة .
* يعني جندر عديل كده ؟
- المرأة تستحق التقدير والاحترام .
* لكن ثقافتنا الشعبية لو قالوا ليك ده ودامو ده معناه خصما منو !! انت ود امك ؟
- ايوه انا ود امي وبعتز واتحدي اى زول اذا قال انا ما مؤدب اقولها بكل الغرور انا امي ادبتني وبقتني زول .
* كيف ؟
- مثلا دفعت بي للناس وانا عمري ست سنوات مشيت اشتغل في سوق الخضار ابيع الاكياس واجي شايل الملاح والحاجات كلها ومع ده كله ودتني الخلوة ومشيت براي بخت الرضا وتعهدتني بالرعاية ولا اعتقد لو الوالد الله يرحمه ويغفر ليه موجود كان حيربيني احسن من كده وانا راضي تماما اني ود امي دار السلام وكثير من خالاتي واهلي ناس الدويم بقولوا لي التجاني ود دار السلام.
* جيت الجامعة سنة كم ؟
- اواخر 1969م .
* ما قريت آداب ؟
- لقيت جماعة اصحابي ماشين قانون مشيت معاهم قانون .
* دار السلام كانت دايراك تبقي شنو ؟
- غرضها بس اقرأ الجامعة .
* وعجبها القانون ؟
- عجبتها قراية الجامعة لكن بعدما عرفت اني حاشتغل قاضي او محامي رفضت ومنعتني اشتغلها وقالت لي دي شغلة فيها 9 في النار وواحد في الجنة من كل عشرة .
* ووافقتها ؟
- اصلا انا ما احتجت اشتغل قانوني لاني وانا في الجامعة اشتغلت في الضرائب واترقيت فيها يعني لو اشتغلت بشهادة الجامعة ما كان حتديني مرتب زي الكنت باخدو من الضرائب .
* شاعر رقيق زيك كده يقرأ قانون ويشتغل في الضرائب ويجي تاني يشتغل في وظيفة اقرب للشرطي فيها ما بتتفق معاي انو تناقض ؟
- لا مافي تناقض لاني استطيع ان اجزم بانو الوظيفة ليست لها علاقة بشكل مباشر ، بمكونات النفس البشرية .. يعني ممكن ان يكون هنالك عشماوي يشنق الناس ويكون زول رقيق وحساس .
* ممكن يكون التجاني حاج موسي هذا العشماوي ؟
- لا .. التجاني لا يمكن ان يكون هذا العشماوي .
* نرجع بيك للمرأة ومكانتها جواك وتقديرك ليها لكنك في شعرك بتدينها هي ذاتها ويكفي كمثال قصيدتك لي امك بتقول فيها (وزولتي الحتا حبيبتها لقيتها براي تحب زولين)
* دي واحدة من افرازات المدينة .. يعني القيمة دي عندنا في الدويم مافي .
* يعني بنات الدويم بحبن زول واحد ؟
- لا تستطيع ان تفصح عن هذا الحب .. المجتمع هناك قابض .. مثلا الاغنية (ان طلعت القمرة اخير يا عشانا تودينا لي اهلنا بسألوك مننا) كويسا او زي ما قال حسن السر لي بت الجيران : (بخاف اسأل عليك الناس وسر الريدة بينا يذيع واخاف اكتر كمان يا غالي من ايديا انت تضيع واعيش بعدك حياتي جفاف مواسم بينها ما في ربيع) .
* لكن عندك زميلك شاعر قال ما جارتنا بت حارتنا وبنريدا .. ده عكس امثلتك دي ؟
- ده زول خرطوم ساكت .. نحنا ناس الاقاليم ديل حبنا عفيف وصموت .
* منو القال حبيبتك الفي الجامعة وبتحب زولين ما من الاقاليم ؟
- تكون تمردت على اعراف وتقاليد الاقاليم والقرية .
* اتشوكشت كثير في حياتك ؟
- نسبيا ممكن نقول شواكيش خفيفة .
* اول شاكوش بتتذكروا ؟
- من بت الجيران واحنا بنقرأ سوا ونذاكر سوا ونعمل الشاي فيجي واحد مغترب من الخليج يعرسها فكان شاكوش قدري .. لاني ما ممكن وانا تلميذ في الوسطي ما بقدر افصح واقول بريدها ودايرها لاهلها وهم اهلي .
* طلع في قصيدة ؟
- ايوه وما بوريك ليها شنو .
* اى شاكوش مؤلم لكن عند الشاعر عندو قـيمة لانو ممكن يطلع في قصيدة تتباع بثمن جيد ؟
- القصيدة لا تباع ولكن يؤذن بها .. ارجو ان تصحح هذا .
* يعني ممكن نقول يؤذن بها بأجر ؟
- يؤذن بها بمقابل مادي وليس اجر .
* ماشي يا استاذ نقول عندك تجربة عاطفية طلعت في قصيدة واذنت بها بمقابل مادي وثانية اذنت بها لكن بدون مقابل مادي بتعتبر الثانية خسرانة معاك ؟
- اذا ما طلعت بمقابل مادي يكون انا اذنت بها بدون مقابل مادي ويكتفي بالمقابل المعنوي وبالتالي ما بتكون خسرانة معاى.
* بصراحة كده هل المقابل المعنوي يرضي الشاعر ؟
- لا ما برضي الشاعر ولا من انصار انو الشاعر يتنازل عن حقو لاننا في عصر صناعة الثقافة لانو طالما المصنف ده بمشي السوق بمقابل بالتالي صاحب الجلد والرأس اللي هو الشاعر يجب ان يأخذ مقابلا ماديا .
* المقابل المادي بتحسب على حسب الشاعر واسمو ام للقصيدة ؟
- للابداع ذاتو .
* يعني اول قصيدة لشاعر تأخذ اجر اقصد مقابل مادي اكثر من شاعر معتق ؟
- نعم .
* انت رياد .. حبيب (بالتشديد) ؟
- الآن وانت معاي في الحوار ده انا في حالة حب لاني احبك لانك اخ اصغر وصديق وما كان حاقعد معاك الجلسة دي اذا انا ما بحبك .
* (نضحك) لكن يا استاذ ده حب ما بجيب قصيدة تجيب مقابل مادي ؟
- (نضحك مرة اخرى) بطلع قصيدة والقصيدة ما مكون لموقف مباشر لكن ممكن تكون تراكمات لمواقف متداخلة .. مثلا احب شرحبيل احمد وخليفة ومنظر الغروب ودي كلها تكون لينا قصيدة .
* اكيد آخر حب ومتواصل كمان هو حبك لزوجتك قبلها حبيت كتير ؟
- اولا مرتي ما علاقة حب بس يعني ربع قرن من الزمان علاقة زوجية اذن السيدة دي بتصبح حبيبتك واختك وامك وصديقتك .. علاقات متداخلة ديدنها المودة والرحمة .
* قاعدة تغير من علاقتك بي امك ؟
- بالعكس انا امي ما عندها بت بتعتبرها بتها وكتير من الاحيان بتقول لي امي انا ما جاياك انت انا جاية لي بتي اللي هي زوجتي .
* مرتك بتغير من قصايدك ؟
- هي اتجاوزت الامر ده خلاص عرفت انو قدرها زوجة شاعر يعبر عن الناس ووجدانهم وبالتالي ما بتقيف فيها كثير .
* يعني ما قاعدة تعمل عليك مجلس مصنفات في البيت ؟
- كتير جدا القاها بتحفظ قصايد وهي عارفة انها اتكتبت في غيرها .
* كتبت فيها شنو ؟
- رفيقة الدرب الطويل من قلبي ديمة بقدرك
وابدا مؤكد مستحيل في يوم اسيبك ابدلك
ودي غناها الراحـــل المقيم محـــــــمد احمد عوض .
* وتاني ؟
- (انت رايق وفايق وانا بالي مشغول) .
وفي القصيدة دي ظهر اسمها :
* وين بالضبط كده ؟
- يا ندي الازهار يا مثال الغيد
مهما تهجرني حبي ليك شديد
نوم غرير وسعيد وانا بالي مشغول
ودي بغنيها ترباس .
* ………………؟
- الشاعر لامن يبقي محترف ممكن يعبر عن اى موقف دون ان يكون حقو هو شخصيا .
* في ناس عرفو اني جاي احاورك فحملوني سؤال اتكرر ليك كتير .
* ـ يقاطعني ـ قالوا ليك اسألني شنو الحاجات تانية حامياني مش ؟
* صحي والله .
قول ليهم قال ليكم الحاجات التانية الحامية التجاني تخص التجاني انتو حاجاتكم التانية الحامياكم شنو ؟
* ممكن زي الترزي تقوم بتفصيل قصيدة ؟
* جدا …
ـ مثال ـ ؟
(حبايبنا وقرابينا وتخاصمونا) بغنوها البلابل و (واحشني يا الخليت ملامحك في حياتي) ابو عركي الاثنين ديل مثلا ما تجارب شخصية لي .. ناس اصدقاء دي تجربتهم طلبوا مني اكتبها ليهم واصيغ مشاعرهم واعتقد القصيدتين الناس بحبوهما .
* وممكن تكون سمكري تسمكر قصايد شعراء ؟
- ايوه .. وكتيرة جدا لكن الآن اقلعت عن هذه العادة .
* ليه ؟
- كنت وانا بصلح القصائد دي للشباب يعتقد اني بوريهم يعملوا شنو لكن اكتشفت قصايدهم السمكرتها ليهم بودوها تجاز وتتغني وبي كده ده يضر بتجربة الشاعر وانا بقيت اميل لي انو الشاعر يتعلم يصطاد قصايدو افضل من اننا نصطادها له .
* الشعر بتعلموه ؟
- لا يمكن والدليل دكاترة في كليات الآداب معظمهم ما شعراء .
* الفضل لمنو في الاغنية .. للشاعر ام الصوت ام الملحن ؟
- قانون المصنفات حدد صاحب الحق الاصيل هو المؤلف للقصيدة وللموسيقي وصاحب الحق المجاور هو المغني يعتقد انو الفضل للمؤلف البشحذ ذهنو وموهبتو عشان يخلق عملا ابداعيا نصا او لحنا ويأتي دور الصوت الجميل في مرحلة تالية .
* التجاني يرتاح لصوت منو ؟
- على المستوي العربي عبد الحليم حافظ وام كلثوم لا نمل سماعهما .
* وعلى مستوانا هنا ؟
- ده سؤال انا ما حاجيب عليه لكن 90% من الفنانين السودانيين والفنانات الاتغنوا باغنياتي احب اصواتهم .
* آخـر شريط بتسمع فيه في عربيتك هسة ؟
- شريط لعمار السنوسي .. صوتو جميل جدا جدا واعيب عليه انو الشريط ضم اغنية للجابري (مانسيناك) ولسيد خليفة (على الجمال) فحقو كان يغني انتاجو بس .
* اجمل لحن لواحدة من قصايدك ؟
- دنيتنا الجميلة للملحن يوسف حسن الصديق ده لحن جميل .
* قصيدة اتمنيت تكون حقتك ؟
- ضنين الوعد لصديق مدثر .
* قصيدة حقت شاعر تاني حاسي انها بتشبهك .
- (حنيني اليك وليل الغربة اضناني) نسبوها لي وهي حقت السر قدور .
* انت حاسي انها بتشبهك ؟
- ايوه بتشبهني .. انت ما حاسي انها بتشبهني ؟
* انا قايلها حقتك لغاية ماقلت انت انها حقت قدور .. طيب صوت اتمنيت يغني ليك ؟
محمد وردي الصوت العظيم ده والحمد لله حيغني لي اغنية للسلام اسمها طيور السلام .
* اول مقابل مادي عن اغنية ؟
- كان تسعة جنيهات وخمسة وعشرين قرشا كان المقابل المادي لاغنية قصر الشوق من الاذاعة سنة 1970م .
* ………….؟
- آخر مقابل مادي كان عن البوم للفنان شرحبيل احمد وبلغ المقابل للنص اربعمائة الف جنيه .
* في شاعر مظلوم ؟
- كل شعراء السودان مظلومين ادبيا وماديا والآن نحن نحاول ان نعيد الامر الي نصابه وبدأت تنفذ قوانين الملكية الفكرية .
* شاعر بتحب تسمعوا ؟
- اطـرب لقراءة سيف الدين الدسوقي لشعره .
* شاعرات سودانيات ؟
- روضة الحاج وسعادة عبد الرحمن وسعدية عبد السلام .
* ما يعجبك في المرأة السودانية ؟
- الحياء والخجل.
* طيب لو شاعرة امرأة كتبت عن احاسيسها ومشاعرها بتعتقد انو حينتفي عندها الحياء ؟
- المسألة نسبية تستطيع الشاعرة ان تعبر عن احاسيسها بدون ان تكون مبتذلة الحرف ولا ضير ان تصفح الانثي عن مشاعرها لكن السفور واختيار المفردة البتصفح عن كنه مشاعر سالبة ده الخطأ .
* يزعجك شنو في المرأة ؟
- في كثير من الاحيان بناتنا بقوا يقتفوا اثار كثير من البشاهدوه في القنوات وبالتحديد في مسألة اللبس .
* في حالة أو موقف ما قدرت تكتبه وتصوروا ؟
- نعم .. حتي الآن عجزت اكتب نص في رثاء الشاعر العظيم استاذي محمد بشير عتيق برغم علاقتي اللصيقة به لمدة عشرة اعوام كنا ما بنفترق وما جاني حرف يعبر عن حزني عليه ما عارف ليه رغم اني كتبت مراثي في من هم اقل درجة عندي منه .
* طيب لو دخلنا معاك مجلس المصنفات الادبية والفنية ؟
- اتفضلوا ..
* انت الامين العام بتاعو ما حاسي انها وظيفة زي العسكري كده محتاجة لشخص رسمي جدا وجاد وكده ؟
- اولاً .. انا ما بشبه العسكري في الوظيفة دي عندنا في المجلس شرطة مصنفات ودي ادارة بتقوم بالضبط والمصادرة والتفتيش وفتح البلاغات للمحاكم .. انا شرطي من نوع اخر معني بالملكية الفكرية وما عندي علاقة بقضايا جنائىة ثقافة الملكية الفكرية ثقافة جديدة في السودان .
* ……………….؟
- عملنا نظام وافقتنا عليه محكمة الملكية الفكرية وهو ان ننهي نزاعات الخصوم خارج قاعات المحاكم .
* جل البتعاملوا معاكم مبدعين ما بتتفق معاي انو بطبعنا السوداني ما بنحب القوانين والسلطة ومتمردين عليها .. المبدع اكثرهم تمردا.. ما بتعانوا في المجلس من هذا التمرد ؟
- السؤال بهذا الشكل مرفوض انا اكره ان تطرح الاحكام في المسألة خلينا نقول ان البعض متمرد ولو كان السؤال كده نقول نعم لكن في ميزه عند السوداني في مرحلة محددة من المفاوضات لو جنح الطرف الثاني للسلم واتعامل بالحسني بتنازل الثاني عن حقو وبرضاه ويعفو .
* بتجامل في القانون ؟
- لا اجامل ابدا في القانون .
* بتتعامل بنظام باركوها يا اخوانا ؟
- بتعامل مع نظام المباركة السميتو انت اذا نفذ القرار الي جوهر القانون لكن ما بجامل ابدا اني اخرج عن اطار الحق والعدالة .
* هل بالضرورة تجاز كل الاغاني البنسمعها دي من المجلس بتاعكم ده ؟
- كثير من البتسمعوه ده لا دخل للمجلس به .
* منو البجيزها ؟
- المجتمع في كثيرمن الاحيان خاصة الاغنيات الركيكة والما بتمر عبر لجاننا المختصة عشان كده في اطار ادارة الرقابة بالمجلس نصادر بعض الاشرطة البتنتج خارج مظلة المجلس .
* قصايدك كلها مجازة ؟
- كل القدمتو للجان النصوص اجيزت الا القليل .
* يعني عندك قصايد رفضوها ؟
- عدد منها رفضوه واعدت النظر فيها مرة اخري واجيزت .
* يعني ما زعلت مرة وانفعلت وقلت انا التجاني كيف ترفضوا لي قصيدة ؟
- انا صادق في القول اني رغم اني لي تلاتين سنة بكتب الشعر لم اكتب القصيدة الفي خاطري حتي الآن وانا احاول واجرب حتي الان كتابة الشعر .
* في قصيدة حقتك بعد ما سمعتها غنوها اتمنيتها لو عدلتها ؟
- ايوه .. وما بوريك ليها .. وبالمناسبة اكثر من اغنية اتمنيت لو اتعدلت في كذا حاجة .
* في قصيدة اتمنيت لو سحبو منها اسمك ؟
- ايوه .. واتمنيت لو ما كتبتها اصلا .
* ممكن نعرفها ؟
- جدا بس يكون سر
* بيني وبينك والقراء بس.
* موافق .. دي اغنية جاي تفتش الماضي بغنيها ترباس .
* ليه يا استاذ دي اغنية جميلة جداً ؟
- اتمنيت لو ما كتبتها و اسحبها لاسباب خاصة .
* بتكتب متين ؟
- مافي وقت محدد لكن كلما اتيح لي هدوء بكتب .
* اثناء الدوام ممكن تكتب ؟
- كثير من الغنا كتبتو اثناء الدوام .
* بتعيد كتابتها ؟
- مرات بتجي مكتملة من اول مرة ومرات نقرأها مع الاصدقاء والشعراء وبنعمل فيها تعديلات في بعض عباراتها .
* منو اول زول بتقرأ ليهو قصيدة جديدة عملتها ؟
- احيانا اقرأ لصديقي الشاعر حسين خوجلي قصائدي الجديدة لانو هو نفسه بتصل بي ويقول لي اقرأ لي مقطع جديد .
* بتتدخل في الحان قصايدك ؟
- قالوا الالحان العلمتها انا لي قصايدي جميلة .
* اجمل لحن عملتو انت شنو ؟
- من بعد ما فات الاوان الليلة جاي تعتذر ودي من كلماتي والحاني وسجلت للاذاعة بصوت الفنان عبد الوهاب الصادق شفاه الله .
* ما بتتدخل في الحان ملحني اغنياتك ؟
- الا اذا دعوني في البروفات بهمس بملاحظاتي للملحن .
* بتحب حقيبة الفن ؟
- جدا لو ماهم ما كنا كتبنا نحنا البعدهم .. انا بحتفي جدا بقصايد عتيق وابو صلاح وكل الكوكبة دي .
* هل في تطور في الساحة الغنائىة ؟
- هناك اصوات شعرية شابة قوية وعميقة وبتكتب الشعر افضل مننا نحنا .
* ابرزهم منو ؟
- كمثال وليس حصر .. اسماعيل الاعيسر وسعادة عبدالرحمن وعدد من الشباب .
* والاصوات الغنائىة ؟
- ولا زال محمود عبد العزيز على قمة الاصوات الشابة الجميلة والمطربة وممكن نقول ياسر ابراهيم ووليد زاكي الدين وعادل مسلم ومها عبد العزيز وديل برضو على سبيل المثال .
* في التلحين ممكن يجينا برعي تاني ؟
- ما بجي برعي لكن ممكن يجي احسن .. في ملحنين شباب لكنهم قبيلة قليلة .
* وبعد سادتي هذا هو التجاني ود دار السلام المسامح والمسالم والرومانسي والدبلوماسي الانيق زيا وعبارة واحساسا .. قال : يا قصر الشوق لو هداك حبيبك مرة ليك صدا .
ببنيك بغلاوة الريد محال انا قصري انهدا