ونسة مع زول فنان جداً ….. أنس العاقب من عازف تربيزة إلى دكتور في الموسيقي ـ) 
كنت إسلامي ومؤذن.. بقيت جبهة ديمقراطية وشيوعي وغنيت لمايو وهاشم العطا والانتفاضة والإنقاذ وأنا ما منافق
يا صلاح ادريس.. خلي الكورة وتعال نعلمك تأليف موسيقى بالقروش
دخلنا الى منزله بام درمان، استقبلنا في الشارع ومعه ابنه الطيب. وقبل أن نجلس كانت المائدة العامرة التي تنبئ أن خلفها امرأة عظيمة. والتهمناها بتلذذ كما نفعل مع ألحان صاحب المنزل.. جئت ومعي الاستاذ فضل الله احمد عبدالله والاستاذ راشد مصطفى بخيت. وفتحنا ابواب في حياة أنس لم يتحرج ولم يطلب سحب أو اغلاق جهاز التسجيل واعتقد ان لديه الكثير المثير.
* من هو أنس العاقب؟
- انس العاقب رجل يخطو نحو العقد السادس من العمر. ولم يكتشف من هو.
* من البداية أردت أن تكون فنان؟
- أنا من بداياتي اردت ان اكون اما عازف أو ممثل.
* طبعاً في المدرسة كالعادة والجمعيات الفنية؟
- نعم أنا في المرحلة المتوسطة كنت ممثل. وعملت معالجة مسرحية لمسرحية «الوعد الحق» وده وأنحنا في كسلا.
* وأكيد كنت المخرج والبطل؟
- لا ما مثلت البطولة لاني كنت قصير القامة. لكن كنت بفوز في الجمعيات الادبية بالمقالات واحياناً بالشعر.
* والغناء؟
- ما كنت بغني لانو المغني بتاع المدرسة كان المرحوم عبد العظيم حركة.
* أنا كنت بفتكر انك من ام درمان؟
- لا نحنا ما من ام درمان. نحن من الشمالية لكن استوطنا في كسلا، والدنا رحمة الله عليه كان امام مسجد كسلا وافتتح كل المساجد في شرق السودان بين القضارف وهيا وعنده خلوة في كسلا. ورفض ان يكون قاضي شرعي واكتفى بامامة جامع كسلا وتعليم الناس أمور دينهم وهو من الدعاة.
* ما قابلتك مشكلة في أنك ولد امام الجامع تكون فنان؟
- لو كان حي كان حتكون مشكلة.
* يعني انت اتفننت وبلغة «المولانات» انحرفت بعد وفاة الوالد؟
- «ضحك».. أنا افتكر اني بقيت موسيقي شايفو طبيعي، لانو والدتنا صوتها جميل وكانت بتغني غناء اجتماعي راقي. وخالي عبد القادر رضوان هو شاعر ومغني وغنى في الاذاعة. وخالي عبد الوهاب رضوان هو شاعر اسماعيل الازهري وعمي عوض الله عبد النبي هو فنان ربوع، لكن سلطة الوالد ومكانة الوالد ما كانت بتبيح لي أغني في الوقت داك وأعلانها في الوقت داك كان صعب.
* لكن رغبتك كانت تمثيل؟
- ايوه.. وفي بورتسودان الثانوية أنا كنت مؤذن المدرسة وعضو الاتجاه الاسلامي. ولاني مشاغب كنت برضو عضو جمعية الموسيقى. والظاهر الحكاية دي ما أرضت بعض الاخوة في الاتجاه الاسلامي وزاد الطين بلة انو احد زملائنا تعلم العود وعرف انو انا حافظ غناء وبقينا ننتحي جانباً في الداخلية أنا أغني وهو يعزف.
* بتتذكر اسمو؟
- ايوه يا اخي اسمو محمد عبد الجبار الكوني وصل عميد في الشرطة.
* وانتشرت كفنان ؟
- يعني.
* والجماعة الكيزان؟
- والله يا أخي ما عنفوني شديد لكني أنا رأيت اني اسيبهم شوية كده.
* وخليت الاذان برضو؟
- خليت الاذان.. نعم.
* بقيت فنان بلا اتجاه؟
- لا.. من أغرب الاشياء مشيت للديمقراطيين.
* يعني الاتجاه المعاكس عديل كده؟
- ايوه.. وناس الجبهة الديمقراطية احتفوا بي وشالوني في الاكتاف.
* نجم تسجيلات يا استاذ؟
- ده كلامك.
* وبقيت ديمقراطي لفترة طويلة؟
- لا.. ما نفعوا معاي.. خليتهم سريع جداً.
* أها شالوك منو المره دي؟
- فِضْلوا ناس المستقلين لكن ما مشيت عليهم.. بقيت انس العاقب. أنا في الحقيقة ما بحب الانتماءات.
* لكن يا استاذ انت عندك نقلات سريعة جداً.. تخلي الاتجاه الاسلامي تمشي للديمقراطيين تخليهم.. تخلي الدراما تمشى الموسيقى؟
- شوف انا بعد طلعت من المرحلة الثانوية خليت كل الكلام ده لا عزف لا غناء لا تمثيل. بديت انمي في موهبة الشعر عندي. وكنت حاسي اني ممكن أكون شاعر ممتاز وكتبت قصائد في الستينات.
* انت قاصد انك ما تذكر تواريخ؟
- لا ابداً مثلاً انا طلعت من المدرسة الثانوية سنة 1960م.
* اتوظفت؟
- اشتغلت محاسب في القضائية ومنها لوزارة الصحة. ونقطة التحول لامن انتقلت محاسب في مستشفى زالنجي؟
* التحول نحو الفن والموسيقى بالتحديد؟
- ايوه رغم اني وقت سافرت زالنجي ما كنت شايل معاي أى حاجة عندها علاقة بالموسيقى، بل كنت شايل دواوين شعر وأدب ومجلات. لكن وجدت مجموعة من الموظفين مكونين فرقة.
* بتتذكرهم؟
- كيف يا أخي ما بنساهم، المرحوم احمد البدوي والنور عبد الله وعقيلي. وعندهم كمنجات وأعواد وبغنوا. وكانوا بفتشوا ليهم لعازف طبلة وما لقو زول، لقوني معاهم وبقيت أعزف ليهم ايقاع على التربيزة.
* يعني بدايتك الموسيقية عازف تربيزة؟
- «يضحك» ومرات بجيبوا «دلوكة» برضو أعزفها ليهم. وما كنت ماهر في العزف المهم بحفظ ليهم الزمن.
* يعني كورة الشراب بتاعتك كانت تربيزة؟
- اها في الفترة ديك رسلوا لي انو الوالد مريض، ركبت الطيارة رجعت الخرطوم ومنها لكسلا، أخدت معاه كذا يوم بعدها قال لي يا ولدي ارجع شغلك، لكن ده وداع وامكن ما نلاتقي تاني.
فعلا رجعت مشيت الخرطوم وهناك اتذكرت انو احمد البدوي.
* منو احمد البدوي؟
- يا أخي قبيل مش قلت ليك ده من شلة الموظفين في زالنجي، كان كومندان السجن راجل فنان خلاص. اتذكرت انو قال عندو عود عند قريب الله، أنا خزنت المعلومة دي وقت جيت ام درمان قلت انا امشي لي قريب الله اشيل العود لأحمد.
* …………؟
- غريب الله كان عندو محل بتاع صيانة وتصنيع اعواد جنب بوستة ام درمان؟
- الكلام ده سنة كم؟
- بين 1962- 1963م، مشيت ليه قلت ليه ما بتعرفني ولا حاجة لكن أنا جاي من زالنجي وسمعت احمد البدوي عندو عود عندك. وهو ما عارفني حأجيك أها رأيك شنو نشيلو ليه. وافق وقال لي العود ده ليه سنتين هنا. ولمحت في الدكان لقيت عود صغير قلت ليه ده بي كم قال لي اربعة جنيه و10 قروش «اربعة جنيه وعشرة قروش» دفعت ليه اربعة جنيه ومنذ تلك اللحظة تقرر قدراً ان أكون أنس العاقب.
* واترقيت من تربيزة للعود؟
- لسه، عادة الموظفين في زالنجي بجو بقعدوا معاي في بيتي لاني عازب نتغدى وكوتشينة ونسمر مع بعض. وبقيت أتمرن في العود يقوموا يطردوني امشي أقعد في ضل بعيد في الحوش أتمرن وحدي. العود بقى ما بفارقني بعد شهر ونصف في جلسة كده قلت ليهم اغني ليكم اتهكموا علي.
* وغنيت؟
- غصباً عنهم.
* غنيت لمنو؟
- كابلي كان في الوقت داك نجم ساطع ومازال طبعاً. وقت أغني ما بعزف بوقف العزف لاني مستجد. المهم جماعتك اندهشوا بعد شهر بقى احمد البدوي ياخذ الفرص مني وهو كان نجم القعدة. وغنيت لكابلي وعثمان حسين والجابري.
* انحنا مستعجلين جيتك للعاصمة؟
- لسه.. الوالد اتوفى قاموا رجعوني كسلا، اهديت العود للجماعة في زالنجي ومشيت كسلا استقريت مع الاسرة موظف والشغل، البيت، الجامع، وبقيت محاسب في المديرية، ناس الحلة قالوا لي انت منعزل مننا نحنا عاملين ليك رحلة ودي نقلة ثانية. مشينا الرحلة خلف الجبل معانا فنان اسمه ابراهيم عوض والعجيبة بشبه ابراهيم عوض ونفس تسريحة ابراهيم عوض وبغني غناء ابراهيم عوض، مفروض يشاركوا معانا أتاخروا وكان معانا العود بتاعه وانا براي كده مسكت العود وقعدت أغني انتبهت شويه كده القى ليك الرحلة حولي وحلفوا علي أغني تاني نفس الغناء.
* …………….؟
- غنيت مروي لكابلي وأغلي من عينيا والكل يوم معانا.
* ومن ديك وعيك؟
- كانوا في البداية بأجروا لي عود بي 25 قرشا بعدها اشتروا لي عود.
* بتغني حفلات؟
- لا لا كانت قعدات في الوقت داك. بعدها سمعوا بي الاطباء وبعدهم ناس الجيش. ووقت انتشر كده دخلت فرقة اضواء المدينة وغنيت فيها مع ابراهيم حسين. والكلام ده من سنة 1963م لغاية 1965م.
* ولغاية الوقت ده ما حددت موقفك من الغناء؟
- لا بل كنت بقرأ اخراج مسرحي وتلفزيوني بالمراسلة. وكنت بدخل السينما بانتظام لدرجة انو عندي كراسين كراس للافلام الغربية وواحد للافلام العربية.
* …………؟
- بسجل فيهم اسم الفيلم والشركة المنتجة والمخرج والسيناريست والممثلين، ولاني كنت بحب عز الدين ذوالفقار المخرج وكمال الشيخ، كنت بمني نفسي بعد أتخرج اسمي نفسي كمال عز الدين.
* ليه لكن؟
- كنت خايف من اسمي انس ولد شيخ العاقب.
* النقلة الثالثة؟
- جاء واحد من المراجعين يراجع المديرية بتاعتنا اسمو محمود الفاضل عملوا ليه جلسة استقبال كده وغنيت فيها، قام نادى صاحبه اسمو محمد بشير مدير السجن قال ليه انتو قاعدين في كسلا وما سمعتوا الولد ده، تاني غنيت ليهم في جلسة تانية. محمد بشير جاء لمدير الحسابات في الخرطوم قال ليه حرام عليكم هناك في ولد محاسب اسموا انس العاقب حرام يقعد في كسلا. وجاء بعده محمود الفاضل قال نفس الكلام فجأة لقيت نفسي منقول الخرطوم.
* وجيت الخرطوم؟
- وصلت الخرطوم في اليوم البقى فيه الصادق المهدي رئيس وزراء. واذكر جيداً انو في جريدة «السودان الجديد» الفنان محمد وردي يهنئ الصادق المهدي. واذكر جيداً الخبر ده مكتوب بالأحمر.
* وكيف استقبلوك؟
- لقيت سمعتي سابقاني.. محمد الخليفة طه الريفي بي جهة والسيد عمر الحاج موسى بي جهة.. على شمو من ناحية حسب الرسول أحمد عمرابي وبقيت نجم جلسات خاصة.
* ما مشيت الاذاعة؟
- اجزت صوتي سنة 1968م لكن سنتين انا قاعد ما مشيت عليهم لانو الجو كان عاجبني جداً. بغني لنجوم المجتمع واعيانه، رئيس الوزراء والوزراء وكده يعني. واتعلمت منهم وعلموني غنيت في جلسة فيها نزار قباني.
* وكنت بتغني لكابلي لسه؟
- كان في غناء ممتاز جداً وراقي. وكان في غناء القعدات كعب وصعب، فأنا فضلت اقتحم المجال ده واغني بالعربي الفصيح غنيت يا ليل الصب متي غده.
* وده كان غناء مسموع؟
- لا ده غناي حقي أنا ولحني براي. وبقيت اكتب غناء شعري.
* زي شنو؟
- يا النائي وقريب يا اجمل حبيب
* وكابلي؟
- بقيت أغني ليه بمزاجي، لكن معظم الغنا حقي براي ولاني بديت اغني بالفصيح احتليت مكانة كابلي وسط المثقفين.
* وناس القعدات دي ما بطلبوا منك غناء تاني؟
- انا كنت بفرض غناي وبرفض اغني «للسكرجية». وبقول ليهم لو دايرين تسكروا بعد ما تسمعوني بي طريقتكم بعد ما أمشي بيتنا. ومرات كثيرة بهرب بالسر منهم وبعدها عرفوني وبقوا يسمعوني. ودخلت بعدها أغني حقيبة الفن واغنياتي القصار.
* في فنانين سمعوك؟
- طبعاً.. وردي مثلاً وأشاد بي في بيت خضر محمد أحمد. وسمعني كابلي وعبد العزيز داؤود وابراهيم عوض.
* منو اللجنة الاجازت صوتك؟
- دي لجنة عجيبة جداً… فيها اسماعيل عبد المعين والماحي اسماعيل وعبد القادر عبد الرحمن وحمزة علاء الدين و 4 اعضاء آخرين.
* غنيت خاص؟
- غنيت خاص وغنيت لابو داؤود مساء الخير يا الامير. وغنيت لوردي مقطع من أمير الحسن ومقطع من ما في داعي لكجراي ولكابلي. وفي نفس اليوم اللجنة تقرر يعملوا معاي سهرة مع واحد اسمو محمد اسماعيل ربنا يرحمه سجلتها يوم الاثنين واذيعت يوم الخميس.
* العربي الفصيح ما عمل ليك مشكلة؟ يعني مش حصرك شوية؟
- لاقاني الشاعر اسحق الحلنقي قال لي انت قول للناس الدايرنو هم، بعد داك قول ليهم الدايرو انت، ألفت نظرهم بالأول. واداني مقطع اسمو يا بلدينا من المساء للصباح كانت ملحنه ودي القدمتني للجمهور. وبعدها عملت غلبنا الهوى، هسه بغنيها محمود عبد العزيز ودي كانت سنة 1968م.
* دخلت المعهد سنة كم؟
- سنة1969م أول دفعة.
* قررت تبقى ملحن؟
- لا أبداً غنيت آخر مرة سنة 1972م لكن خفت يكون مصيري زي كثيرين انتهوا، فحبيت يكون عندي اتجاه دائم.
* وعندك علاقة بمايو؟
- نعم….. معظم ناس مايو أصحابي
* كنت شيوعي؟
- لا… أنا كنت شيوعي لمدة 5 شهور في القضارف في سنة 1965م وخليتهم لاني متمرد بطبعي.
* ومايو علاقتك بيها شنو؟
- لا بس لانها جات ضد الاحزاب عجبتني.
* يعني داير تقول أنو ما عندك اي انتماء؟
- شوف لو في انتماء وانا مفجوع فيه هو انتمائي للانقاذ لانها قناعتي.
* ناس مايو اصحابك؟
- طبعاً نميري وابو القاسم والزين كو اصحابي قبل الانقلاب.
* غنيت ليهم؟
- أيوه موسم الحصاد للشاعر محمود خليل من أجمل الالحان العملتها.
* وانقلبت مايو بي هاشم العطا؟
- انا داير اقول ليك حاجة.. كانت عندي علاقة خاصة مع عبد الخالق محجوب وعلاقة خاصة مع كبار الشيوعيين.
* وبرضو تقول لي ما شيوعي؟
- والله ما شيوعي.. يقال اني كنت بغني في اجتماعات اللجنة المركزية للحزب الشيوعي تمويه. يعني انا بغني واللجنة مجتمعة وناس الأمن ما جايبين خبر.
* وعبد الخالق؟
- نميري عرفته قبل الانقلاب ببسيط، لكن عبد الخالق محجوب عندو علاقة مع حسب الرسول احمد عمرابي وبابكر كرار وعبد الله الطيب. وبحضر نقاشاتهم لاني كنت سكرتير حسب الرسول وكيل وزارة المالية.
* وعبد الخالق كان بطلب منك غنا محدد؟
- والله بتذكر دائماً بطلب اغنية بطرب ليها شديد جداً كاتبها واحد اسمه احمد عبد الرحمن الناخب يمني والاغنية دي اترفضت في الاذاعة بتقول:
يرعى الله زمانا كان للعشاق مغنى
بين كأس بين دن وغزال يتثنى
وفصيح عبقري الصوت بالشعر تغنى
حيث لا هم ولا غم ولا حاسد معنا
يا حبيب القلب قل لي ما الذي أخفاك عنا
دي كانت من الأغاني المحببة له وأعتقد انها ستغني في شريط قادم.
* كنت عضو اتحاد الفنانين؟
- رغم أني ما كنت مستوفي الشروط لكن ظهوري المفاجئ وبروزي بالشكل داك خلاهم يتجاوزا اللوائح ويقبلوني عضوا. واكيد في ناس كتار ساهموا في انو يكون في فنان اسمو أنس العاقب، زي علي ميرغني والاستاذ عبد الله عربي. ومن الفنانين ابراهيم عوض وعبد العزيز محمد داؤود ووردي ذاته والكاشف.
* ليه ما واصلت غناء؟
- تعرف في كابح داخلي مانعني ابقى مغني.. الحمد لله بقيت موسيقي لكن كمغني ابت.
* جاء انقلاب هاشم العطا كيف اتعاملت معاه؟
- طبعاً ايديتو.. واتكتبت مذكرة تأييد في جماعة كتبوا اسمي فيها قلت ليهم ماشي واتبثت المذكرة.
* كتبها منو؟
- ما في داعي.. كتبها رجل ربنا يرحمه خليهو.
* وليه ما وقعت فيها؟
- وقت يكتبوا فيها انا كنت ماشي على بيتنا اسمع بيان هاشم العطا.
* كنت مبسوط من الانقلاب؟
- نعم.. انا قابلت مرة هاشم العطا في بيت واحد اسمو عباس عجيب قبل الانقلاب بشوية. وكان هادئ جداً سمعني وبعدها قال لي ما قاعد تغني في الاذاعة؟ قلت ليه لا، قال لي أحسن وشعرت انو اطراء لي.
* طيب اهتمام الشيوعيين بيك وعلاقتهم دي بيك بريئة ساكت كده؟
- اهو ده التاريخ اتحدى اي زول يقول نظموني.
* والقيادات دي ما حاولتك تكون شيوعي؟
- اصلوا ما اتكلموا معاي.. ربنا حماني منهم بس.
* سمعت البيان؟
- شفتو في التلفزيون.. هاشم العطا ما كان جيد في التلفزيون من بدأ البيان لغاية ما انتهى ما رفع رأسو من الورقة.. وقرأ البيان بخوف كده.
* وغنيتو ليه؟
- تاني يوم غنينا حنتقدم كورس مع وردي. ونحنا خمسة اشخاص غنينا كورس مع وردي حتعرفنا كيف.
* ونميري رجع؟
- حققوا معاي وصادف انو المرحوم الرشيد نور الدين كان مدير الامن. وواحد من الموردة شقيق جعفر بخيت. وواحد تاني اسمو رمضان، رفدوني من التجارة والاذاعة والتلفزيون ومعهد الموسيقى والمسرح ولغاية هسه في فايلي بتلقى انو الزول ده شارك مع الطغمة المنقلبة. بعد داك مشيت لنور الدين قلت ليه يا دخلوني السجن عشان اقدر آكل أو فكوني خلوني آكل لأني في سجن أكثر من الناس الجوه السجن.
* وعفوك؟
- عملوا لي اجتماع صوري كده قالوا لي انكر. نكرت لاني صادق ما مضيت على البيان ولا شفتو، رجعت شغلي ورجعوا لي مرتبي طوال الشهور المرفود فيها.
* ورجعت المعهد؟
- دي قصة غريبة جداً لأني غبت سنة والنميري أمم الشركات. وكانت في شركة اسمها شيكان بتاعة ناس محمد عباس في شارع الدكاترة عينوني فيها محاسب يوم 19 يوليو 1972م في نفس يوم هاشم العطا.
* انت قصتك شنو مع الرؤساء تجي الخرطوم يوم يعينوا الصادق تشتغل يوم انقلاب.. شنو الحكاية دي؟!
- أنا بالمناسبة قاعد اربط الاشياء.. ذاكرتي قوية جداً.. نرجع للشركة.. اشتغلت فيها بواسطة ناس طبعاً.. وقت رجعوني المعهد ناس مايو قام الماحي اسماعيل رفض اواصل مع دفتي، قلت ليه انا اول دفعتي وهم كانوا امتحنوا. ولاني ما قريت أى حرف في السنة ديك قلت ليه بواصل مع دفعتي وامتحن.. فعلاً امتحنت ونجحت.
* مشيت رابعة؟
- وجيت اول الدفعة وابتعثوني لالمانيا الشرقية؟
* دفعتك كان فيها منو؟
- نجوم.. عثمان مصطفى ومحمد ميرغني وعبد الله الكردفاني والمرحوم علي ميرغني والدكتور الماحي سليمان والدكتور محمد سيف يس والاستاذ سالم الطيب والاستاذ محمد الحسن محمد احمد هسه عازف في الفرقة السيمفونية في النمسا، عندو مؤلفات في الفرقة دي.
* في الفترة ديك عملت ألحان؟
- وقبل ده انت ما سألتني عن الدراما سنة 1968م وقت كنت بغني القاص ابو بكر خالد عليه رحمة الله اعجب بي وعمل لي مخصوص مسرحية اسمها اشياء صغيرة ولد مغني فقير ساكن مع صديقه ما عندهم شغل، سيد البيت غني بنته عندها حالة نفسية الولد المغني وقت يغني بترتاح. وبعد ما كان سيد البيت مطاردنا بقى يتودد لينا وكنت انا البطل والهادي الصديق صاحبي والمرحوم حسن عبد المجيد ابو البنت ونادية جابر هى البطلة. وعثمان على الفكي ظهر في مشهد واحد وقت جاء سايق البنت والراجل ضربو كف وتاني ما ظهر. اخراج صلاح السيد. وكان مفروض يخرجها احمد عاطف، البطولة الثانية مسرحية الخضر يوسف خليل كنت انا المداح الاول والمادحين الاثنين عاطف خليفة والماحي سليمان نحن بنعلق على الحدث.. فيها هاشم صديق وعوض صديق وانور محمد عثمان ونادية جابر واخراج تركاب جات بعدها أحلام الزمان لهاشم صديق، أنا مفروض امثل البطولة وقبل العرض بأسبوع تركاب المخرج دخل في دوري اللي هو عز الدين، المهم تركاب لعب دور ممثل وأنا اغني قام هاشم صديق عمل فيها أزمة وصلت المحاكم بانو تركاب فسر النص تفسير خاطئ. وأخذ هاشم صديق يخرجها براه للتلفزيون واخرجها للتلفزيون هو ومعاه يس خليل واتعملت 3 حلقات بطولتي انا وتحية زروق.
* قابلتك فيها مواقف وطرائف؟
- اذكر في أحلام الزمان هاشم صديق قال لي يا أنس وانت بتغني في الاغنية عاين لتحية زروق في عيونها. وانا ما قدرت اعاين ليها قمت قلت لي هاشم…..يا أخي ما تكورك انا ما بقدر اعاين ليها، تعال وريني بعملوها كيف قام جاء وفشل قال لي كلامك صاح!!
* اتخرجت تأليف موسيقى؟
- واشتغلت موسيقى لعدد من الاعمال الدرامية تاجوج وباب السنط.
* واول لحن لأغنية؟
- اديتو البلابل «عمر الهنا»
* مشيت ألمانيا؟
- عملت ماجستير في التأليف الموسيقى.
* خليت الغناء؟
- نعم.. وان كنت انا أعد العدة لاصدار اغنياتي. ودي يصعب جداً على كثير اداؤها الا البلابل وهادية طلسم. ولذلك ما حا أرجع للغنا وان شاء الله اتفقت مع جهة ما لتمويل الانتاج للشرايط دي وأغنيها براي عشان اثبت مدرستي.
* لكن محمود عبد العزيز غنى ليك؟
- والموصلي غنى لي نبض الشارع والسقيد بغني غناي كله.
* عندك كم لحن؟
- ما بتحصيها… المشاعل براها حوالي 300 لحن.
* اجمل اغنياتك؟
- ناس بقولوا ليك الشجن لكن انا عندي أغنية من كلمات هاشم صديق اسمها كمل العسل، دي جميلة جداً وللأسف ما اتغنت حتى الآن. بتغنيها هادية طلسم. وفي انت ادري لسعاد الصباح. وفي مني الروح كلماتي أنا، دي أغاني كلاسيكية ودي حا أنزل بيها السوق براي.
* اجمل أغنية سودانية؟
- عازة في هواك.
* ليه عشان بعدها الوطني؟
- لا.. لأننا لغاية هسه ما قدرنا نعمل لحن زيها، خليل فرح عمل فيها مقدمة موسيقية وتحويل موسيقى وآهات. والأغنية وآهات وختام محتمل يكون الكاشف.. محمد الامين في الملحمة تجاوز لكن عازة في هواك ما اعتقد أنو في زول غناها زي ما غناها خليل فرح أو اتعزفت زي ما عمل خليل فرح أو اتلحن لحن زيها. يعني خليل فرح تنبأ بالمدرسة الحديثة مع الحقيبة طوالي، لانو ثقافته الموسيقية سابقة.
* أحب صوت سوداني لأنس العاقب؟
- الجابري.. واسع وفيه طرب وابو داؤود ووردي وكابلي وابراهيم عوض.
* لحن تمنيت ان يكون حقك؟
- شجن لعثمان حسين.
* صحي انت رفدت وردي؟
- ابداً.. أولاً أنا ما عميد عشان ارفدوا. ووردي اترفد لانو ما كان قادر يوفق بين الدراسة والغناء. ووردي كان شاطر جداً.
* كانت الشهادة حتضيف لوردي؟
- أكيد.
* فنان تمنيت ان يدرس الكلية؟
- تمنيت وردي يكمل المعهد لانو كان شاطر. واتمنيت لو كرومة اتعلم عزف العود كان الموسيقى السودانية اتغيرت.
* طيب لو قالوا ليك انت عميد لكلية الموسيقى والدراما وعندك فرصة تعين فنان ما قرأ تجيبوا استاذ في الكلية تختار منو؟
- بدر التهامي للكمان.
* منو العجبك من الشباب؟
- كثيرين.. محمود عبد العزيز وعصام محمد نور ووليد زاكي الدين وعابدة الشيخ.
* موسيقار شاب؟
- سليمان ابو داؤود عليه رحمة الله.
* تعال نخش الانقاذ.. شنو علاقتك بيها تجارة، أو بحث عن دور في الحكومة الجديدة دي؟
- ابداً.. أنا سمعت اسمي ضمن اسماء ناس كتار جداً، اقابل وزير الثقافة عبد الله محمد احمد معاي ناس سعد يوسف وغيره، قابلناه لقيناه داير يوسع شغل الوزارة بهيئات ووزعونا على التلفزيون.
* ما كان عندك موقف من الانقاذ؟
- أبداً.. كنت مؤيد الانقاذ لانو الوضع كان صعب جداً وما محتمل. ولانو الانقاذ في بدايتها ما كان ظاهر عليها لون سياسي. وشاركت في تنظيم الاحتفال بالعيد الاول مع د. الطيب ابراهيم محمد خير، زول قال ليك تعال شارك معاي تقول ليه أبيت. انا ما عندي أىة علاقة بأى جسم سياسي.
* والمشاعل دي؟
- كلام للتاريخ.. انا جيت عضو مجلس ادارة في التلفزيون مسؤول عن المنوعات، كان معاي فيها حسين خوجلي ومعتصم فضل وعصام الصائغ. ومدير التلفزيون وقتها كان راجل عالم د. جمال الدين عثمان عملني مستشار برامج والكلية كانت مغلقة. وفي سمنار المال العام كتب هلاوي 14 مقطعا جابها لي طارق البحر لحنتها ليهم ودي أول تجربة لي مع الاعمال القصيرة. وفي اليوم الختامي قدمناها في المجلس الوطني، قام ناداني وزير الصناعة قال لي الرئيس قال لي أنس العاقب بالمشاعل دي لخص السمنار كله.
* ودي بداية المشاعل؟
- لا.. كانت في وردة بجيبوها في الشاشة اذا في حاجة عطل أو زمن زايد، الرئيس قال ليهم يا جماعة استغلوا مساحة الوردة دي بي حاجة فنية ومفيدة. وجابني حنين قال لي ما نعمل شغل زي بتاع المال العام. وعملنا عن الكهرباء والموية والسلام وما بوبار وانتشرت زي من حلفا لي نمولي.
* قالوا لقيت منها مال كثير؟
- المشعل الاول عملناه بي اربعة الف بس. وسأل حنين وقال لي القروش دي شوية؟ قلت يا أخي الحكاية دي حتبقى لي نقاطة، فحقوا انا ما أغالي فيها، تخيل انو مشعل مليون سلام انا والشاعر والاستديو والعازفين والكورس اخذنا 20 الف. وقت قالوا نكتب اسمانا رفضت وقلنا دايرنها رسالة قد يكون في زول ما بحبني أو ما بحب هلاوي أو تيراب يقوم ما يحب المشعل.
* قالوا انت قلت رأي جيد جداً في ألحان علي أحمد؟
- تقصد صلاح ادريس.. انا لم أذهب لاية جلسة استماع لالحان صلاح ادريس، لانو ما ممكن اقول كلام موسيقي في اول جلسة.
* البمنع شنو تمشي تسمع؟
- المطلوب انك تقول كلامك في نفس الليلة، قلت ليهم ادوني شرايط اسمعها اكتب رأى.. شفت قوافل من النفاق كأنما ما كانت تجربة موسيقية قليلة، الآن اشتريت الحانه كلها من السوق كلفتني 30 الف جنيه وسمعتها وحأقول رأيي في الصحف.
* مش مكسب للساحة الفنية زول زي صلاح ادريس بكل ثرائه وألقه يتجه للابداع؟
- اكيد.. ولا في واحد يقدر يمنعوا.
* بتحسدوا؟
- لا.. ابداً في الموسيقى ما في حسد.
* ……….؟
- مفروض تُقيَّم الحانه هل هى قدر الضجة دي.
* انت رأيك شنو هل لو انتجها أى ملحن آخر حا تحصل ليها نفس الضجة؟
- لا ..ابداً… Money talks
*……….؟
- يا أخي حتى لو بتستحق ما في داعي للضحة دي كلها، في شباب بعملوا ألحان جميلة وجيدة.
* ……………؟
- الحان تتسجل طوالي.. الغريبة اول تسجيل له كان يوم الثلاثاء 1998م، قال لي حسن فضل المولى عندنا تسجيل لصلاح ادريس تعال احضر، ما مشيت لاسباب وسجل ضحكتك ومعاها حاجة تانية، مشيت سمعتها ما اتفاجأت بيها الحان عادية ما هابطة، كلمات جميلة لكن الالحان ممكن نديها مرور.
* افتكر مرور من أنس العاقب درجة جيدة؟
- انا الحمد لله عيني ما مكسورة لا اداني قرش لا تعريفة.. صلاح ادريس يلحن بهذه الكثرة وهو مبتدئي حتكون الحانه متشابهة.. الآن عنده 80 لحنا.. كيف دي.
* زول ماعندو معاناة «باله» رايق؟
- الاستاذ صلاح ادريس معلق ومحلل رياضي ويكتب صفحة كاملة كل أسبوع، وداير يبقى رئيس نادي الهلال وعليه عبء الامبراطورية الاقتصادية، لو بالطريقة دي كلها ما عندنا هموم، دولابي ما فيه قرش لكن فاضي، أنا عندي غناء بشبه بعضو.. صلاح ادريس كان مفروض يكون زي واحد ظهر في منتصف القرن التاسع عشر من أحسن المؤلفين الرومانتيكيين، لكن كان ولد أغنياء تعرف ده اكتشف «باخ» بعدما اندثر وده ابو الموسيقى بقروشو قدمم لينا الثروة الاسمها باخ.. انا رأى صلاح ادريس يعمل مؤسسة ترعى، ما فرد يصرف عطايا على الفنانين ، زي نوبل.
* انت رأىك صلاح ادريس يبقى شنو؟
- اقول ليه خلي الكورة وابقى على الموسيقى، على شرط يقرأ دراسات اضافية في كلية الموسيقى سنتين عشان يعرف انو كان بهبش في طرف الاشياء.
* وانت ممكن تدرسو؟
- ايوه ادرسو بالقروش.
* طيب وانت ناقد في رأيك هل كبار الفنانين وقفوا، نضب ما عندهم وبقوا عايشين على العصر الذهبي كما يقولون؟
- طبيعة الاشياء أى حاجة بتقيف عند حدها، ما ممكن تلبس لبس زول تاني.. ابراهيم عوض ما ممكن يغني باحساس جيل محمود عبد العزيز. الانقاذ فتحت ليها 40 جامعة ده كله جيل مختلف.. الاغنية مختلفة.. الاحساس مختلف الحب ذاتو اختلف.
* رأيك شنو في الهجمة من الاغنية العربية؟
- شوف دي جريمة كبيرة جداً جداً.. انا مستغرب ليه عوض جادين بوقف الاذاعات المتخصصة في الوقت ده ويفتحوا محطات تبث أغنيات عربية وغربية بقوا شبابنا يحفظوا الغنا العربي والغربي والاذاعة هى السبب.
* لانه الغناء قديم. وجيلكم ده ما بحب الا جيله الذهبي؟
- لا الاذاعة لازم تقدم جديد.. غناء جديد.. اصوات جديدة.
* طيب لو دايرين ننتشر نغير لوننا شوية كده عشان نصل العرب؟
- ما نصل العرب.
* ننتشر وين؟
- ننتشر في افريقيا، نحن الآن في تشاد وجيبوتي والصومال ونيجيريا أغنيتنا الاولى، انتو ليه ما دايرين الناس الدايرنكم والعرب لا سلمنا ولا مزاجنا.
* الحانك شرقية؟
- لا أفريقية سباعي
* ……………؟
- مشكلتنا اعلام العالم العربي فيه 240 قناة ،العراق فيه كذا قناة، لبنان قدر الخرطوم فيها 35 قناة، حزب الله عنده قناة.
* رأيك شنو في النيل الأزرق؟
- بدون قروش ما حتعمل شئ - الليلة الدقيقة بتكلف 120 الف جنيه في تلفزيونا ده. واخشى توقيع الاتفاقية ينقل ذلك النقل القبيح في الاتفاق الاول.
* هل انت صوفي؟
- انا جدودي كلهم صوفية، جدي سلمان العوضي، مذكور في كتاب الطبقات، لكن ما بقدر اقول ليك انا صوفي.
* عشان كده رسالتك لنيل الدكتوراة جات عن طريق الطريق الصوفي؟
- لا ابداً هو كان اقتراح من بروفيسور الفاتح الطاهر عميد كلية الموسيقى والدرما، قال أعمل حاجة عن الطرق الصوفية. وأنا في اعتقادي القيم التي اخذتها جيدة.
* اللي هي؟
- الخصائص النغمية والايقاعية في غناء الصوفية - السمانية نموذجاً.
* في فرق في ايقاعات الاغنية والمديح؟
- في سمع ده عادي.. الظاهرة الطبيعية. وفي استماع وهو داير تركيز شوية، اما السماع فهو للصوفية ده عشان تصل بيه لمراقي أعلى في التصوف الموسيقى، تستطيع أن تنقل الانسان الى حالة الوجد وحالة الوجد هى ترتفع بالانسان لكي ينسى انه عنده ارتباط كثيف ويصبح انسان متحرر لطيف. ويقال ان الانسان عندما يصل لهذه المرحلة يستطيع أن يخترق الحائط.
وبعد سادتي يبدو أنني اخترقت مناطق لدى أنس العاقب وبقيت أخرى، فالرجل صريح وواضح وذو أفكار جريئة.